إلى مسؤولي جماعة زايو المحترمين :
ربما من الوهلة الأولى قد تتعرفون على هذا المقطع الطرقي في الصور أسفله …
تماما كما تعتقدون ، الطريق الرابطة بين مدينة زايو و راس الماء ، لكن نحن هنا بصدد الحديث فقط عن مسافة قصيرة لا تتعدى 3 كلم ، أي بين مركز مدينة زايو وحي مرشال ، حيث أن هذه المنطقة كلها تابعة لجماعة زايو ، وقبل أن نخوض في تفاصيل الموضوع دعوني أذكركم بأنني سأتكلم كالعادة بالعامية نزولا عند رغبة بعض المتتبعين الأوفياء ، سمحوليا نهدر بالدارجة باش كولشي يفعم ، مؤخرا عرفت هاد المنطقة ( بين حي مرشال و حي الجديد ) ارتفاعا مهولا فعدد المنازل لي تبنات بين ليلة ونهار ولي سماه البعض بالبناء العشوائي والبعض الآخر يقول أن هادشي عادي وضروري خاصو يكون حيث أن الكثافة السكانية بهاد الجماعة غادة وكتزيد ، لكن عموما هذا ماشي موضوعنا ، موضوعنا الرئيسي هو المطبات لي كاينة فالطريق ( السوكوسات ) وهي ليست مطبات قانونية ، إنما هي مطبات عشوائية ما عدا 3 منها ( من أصل 12 ) وهاد 3 توضعات من طرف الجماعة وتوضعات فالنقط السوداء رغم أنها هي الأخرى ماراعوش فيها بعض الشروط وندارت بطريقة سوقية إن صح التعبير إلا أنها على الأقل دارتها الجماعة ، لكن 9 ديال السوكوسات الأخرين هما عبارة عن كومات من التراب أو من الإسمنت توضعات بطرق جدا مخزية ، من العيب والعار أنه تجي شركة دوز كابل ديال الكهرباء أو ديال الهاتف أو قوادس ديال الماء ، تجي شركة تحفر كيف بغات وتخلي كولشي موراها أو تغطي ديك الحفرة على هواها هي ، واش كاينة السيبة فالبلاد ؟ فين هما المسؤولين ديال الجماعة ؟ شنو هما الشروط لي كتفرضها الجماعة على هاد الشركات ؟ شنو هي المعايير لي كتحطها الجماعة بعين الإعتبار قبل ماتعطي الموافقة لهاد المقاول ؟ ولا كلها يلغي بلغاه ؟ حفر وزيد ؟
ومايجيش شي واحد يقولي ماشافوهمش ، أولا هاد المهزلة تابعة للجماعة أو ما كان يسمى سابقا البلدية باش كولشي يفهم ، هاد الكارثة تابعة للبلدية ، وباش نكونو واضحين أكثر ، حيث أن أحد نواب رئيس الجماعة المحترم كيمر من هاد المقطع الطرقي يوميا حيث أن المنزل ديالو كائن عند آخر مطب تقريبا ، حنا مكنلوموش النائب المحترم بصفة مباشرة ، هاد السيد كلنا كنحترموه وكلنا كنحبوه ، لكن فآخر المطاف كيبقى هو طرف من أطراف هاد الجماعة …
السؤال المطروح علاش خليتو هاد الشركات تلعب فهاد الطريق ؟
صدقوني أن هادشي كارثة بكل المقاييس ، كتستهزأو بالمواطنين يا سادة ، حنا مابغيناش الكلام المعسول من 5 سنين ل 5 سنين ، حنا بغينا نشوفو ونلمسو حبكم وغيرتكم على هاد المدينة أو بالأحرى على هاد الجماعة يطبق على أرض الواقع ، حنا كساكنة درنا فيكم ثقتنا لكن ماتخليوناش ندمو الله يرحم الوالدين …
حنا ماكنطالبوش بالمستحيل ، فقط بغينا جواب مقنع ، وملي تجي شركة أو مقاولة ماشي غي دوزولها الصفقة ونبينا عليه السلام خاصكم تجبروهم على أنهم يحترمو داكشي لي اتفقتو عليه فدفتر التحملات ، حنا فدولة الحق والقانون ، ماشي بلاد السيبة الله يجازيكم بخير ، ماشي لي بغا يدير شي حاجة يديرها ، ولي عندو الشك فكلامي يمشي يعاين الوضع راه المسافة قريبة بزاف وهاد المهزلة حدها حي مرشال ، و لن يفوتني في هذا المقال أنني نشير لهذوك المطبات لي توضعات مؤخرا داخل المجال الحضري لمدينة زايو أنكم قلتم في أكثر من مناسبة أن الشركة لي فوضتو ليها الأمر غادي تصبغ هاد المطبات ، لكن في الواقع صبغات فقط هذوك لي فالطريق الرئيسية ( طريق بركان-الناضور ) صبغوهم بواحد الصباغة لي حشومة كاع نقولو عليها صباغة ، صبغوهم بالطباشير الله أعلم ، وخلات الأخرين عبابز ديال السيمة ، وخاصكوم تعرفو أن هذوك ماشي ممر الراجلين وما كيتعتبرش ممر الراجلين إلا ماكنش مصبوغ وأنتم أدرى بذلك منا ، لكن المقاول دار لي فراسو وداكشي لي فدفتر التحملات ضربو عرض الحائط … والسؤال المطروح ، فينكم يا مسؤولين هاد المدينة المنسية ؟ فينكم يا مسؤولي هذه المدينة اليتيمة ؟؟
إلى مناسبة أخرى إن شاء الله ، وإلى ذلكم الحين تقبلوا مني فائق الحب والإحترام .
اخي نشكرك على المرضوع موضوع مهم لي يجي إدير السكوس في الطريق و يحفر في الطريق و لي بغا يمر ولا إهرس سيراة ديالو مشي شغلي عذا هوا الفكر ديال الساكنة . نطلبو من المزيد نشكركم زايو سيتي
السلام عليكم
اولا اشكر صاحب المقال.
انا بدوري من مستعملين الطريق يوميا و للاسف اصبحت الطريق مهزلة و عار على البلدية .
اتمنى أن يلقى مقالك اذن صاغية و تتحرك البلدية لأداء واجبها .
نجاوب صاحب المقال باش نشكرو على الموضوع المثال .بالفعل لي ادوز من ذيك طريق اخصو يتعلم مشية البطريق .حيت من كثرة الافات فيها والممات خلتني شخصيا نقول اللهم لحفاري والدودنات ولا كثرة لكصيدات ولقتيلات .بصح متقلقش ياصاحب المقال راه بلمهل انتكل بودنجال .راه قريب تولي ذيك طريق فيها 12 متر عرض نمنعو على كل واحد بغا ادير فيها البغض .
كلمات بالدارجة من اجل ايصال المعلومة الى المتفاعلين مع الموضوع مرة اخرى اشكر صاحب المقال الذي نبهنا الى المزيد من العمل من اجل اعطاء جمالية لمداخل المدينة .
الكلام المعسول مكيهمش الى كاين شي صح بدو بيه المشاكل. ماشي غي ف الطرقات كاين بزاف لحوايج لي خاص المسؤولين يبداو بيهم ديرو غي 5ف100من داك الشي لي كنت كتقولو ف الحملات الانتخابية سمحولي على العامية ديالي خوكم مقريش السلام عليكم شكرا موقعنا زايو سيتي
السلام عليكم..
اسيدي نلاحظ السرعة الفائقة في السياقة مع الطريق التي تمر بحي الوفاء ومرشال مشكلة مع اصحاب السيارات كانهم لا تهمهم الحوادث المميتة التي تحدث من حين لأخر .. ان جوانب هدا الطريق مملوءة بالتلاميد والراجلين من بينهم النساء والأطفال والرجال الله يهديكم ايها السائقين مادا نقول عن تطبيق قانون السير وسط الأحياء والمدارس والقاهي والأماكن العمومية ؟ الله يهديكم راعوا سلامة الناس وتعاونوا الله يهديكم !!!!