زايو سيتي.نت عادل عسراوي
ايلا كنت من الناس اللي ماعندهومش جينات وراثية معززة للحرق (بالعربية ايلا ماكنتيش من دوك اللي كياكلو نهار و ماطال جميع انواع تدسمات الطبخ المغربي بدون مايتزاد فيهم مكعب واحد ديال الوزن) فتبع معايا هاد النصائح والتجارب اللي استخلصتها من عشرات ساعات البحث و مشاهدة كافة المواد العلمية الصحية على الانترنيت ، وغانختصر عليك مجموعة من الاخطاء اللي وقعت فيها فالمحاولات ديالي لكسب الجسم المثالي فبضع فقرات.
نظام الاكل المغربي ديالنا عامر بثغرات كتخصر التوازن الغذائي اللي قرينا عليه فالنشاط العلمي، الماكلة المغربية العامة ديالنا عبارة عن نظام كايرتكز بشكل مفرط على النشويات/كاربوهيدرات و السكريات و الزيوت، هاد العناصر زايدين بزاف فالسعرات الحرارية، و بما انه مابقيناش عايشين فنفس الوسط اليومي ديال جدودنا (اللي كايفيق معا النبوري يمشي للجنانات و الحقول يجري يعفط يحرث يركل يتسلق يزرع يحصد يدرس يقطع يحفر يهز يحط…) ولينا عايشين فعصر ديال راحة .. تفيق تفطر ونتا جالس تمشي فالطوبيس..طوموبيل ونتا جالس، تكون فالقراية/الخدمة ونتا جالس، تجلس معا صحابك فالقهوة واخذ راحتك كاملة، و زيد و زيد…)،بالتالي داك اليورانيوم اللي كاتعمر بيه كرشك ماكاتخدموش، الشيء اللي كايخلي الجسم ديالك كنوع من الميكانيزم الاحتياطي كايخزن داك الفائض فخلايا دهنية،بالتالي الحل باش تحيد دوك الكيلووات هو تحرقهوم . فكل كيلوغرام واحد ديال الدهون كاينا ما يقارب 7000 سعرة حرارية مايعادل 3 أيام ديال الماكلة ، ونتا كل نهار خاصك على الأقل واحد المقدار من السعرات. الحالة ديالي شخصيا كانحتاج لمايقارب 3000 كالوري غير باش نحافظ على الوزن و نخدم كافة الاعضاء دياولي ف 24 ساعة من رئتين و قلب و كبدة وعضلات ، المهم الدورة كاملة. ايلا بغيتي تحسب الاحتياج وهذا المثال ديالي : هذاBMR
BMR = 66.5 + ( 23.75 x 85 kg ) + ( 5.003 x 186 cm ) – ( 6.755 x 26 years ) =3000
من بعد ما تعرف شحال كاتحتاج يوميا كايخصك تعرف شحال كاتحرق ، بالتالي كاينين ثلاتة ديال الطرق باش طيح : التمارين، الحمية الغذائية، أولا بجوج فدقة وحدة،و أسرع طريقة لحرق الدهون هي تنقص الكاربوهيدرات والسكر، و تمارس تمارين كايقومو على حركات سريعة و قاسية ففترة زمنية قصيرة بحال البوكس فاش تكون ضرب فديك الخنشة المعلقة بنمط منظم، مثال 60 ثانية و تستاراح 30 ثانية، تبقا تعاود هاد العملية ل 30 دقيقة باش واعرين هاد التمارين اللي كايكونو صدمة عضلية و تنفسية للجسم ديالك، بداك الجهد اللي كاتريني فيه فديك نص ساعة، فالجسم ديالك كايمشي ديريكت للخلايا الدهنية يحرقهوم لاحقاش ماقدرش يحقق توازن الاوكسيجين اللي ناقصك مع الطاقة اللي كايعطيها ليك الكبد، نزيد نعطيك أمثلة و طرق ولكن ماخاصنيش نطول عليك، بالتالي هاك هاد النصائح و الأفكار خود منهم اللي ينفعك :
*نقص من السكر والنشويات و بيمووات والعواصر الصناعية، وضرب ليا شويات.. الخضرة والفواكه.
*فطر بالبيض” أجود أنواع البروتين ومطيل للشبع” .
*ماعمرك تجوع راسك وتبقى صابر، قسي معا راسك، راه ملي كاتبقا بلا ماكلة الجسم ديالك كايهبط من معدل الحرق وكاتولي من بعد تاكل بشراهة، وفوق من القياس الجسم ديالك كايحساب ليه دازت علىك المجاعة الأفريقية و كايستعد للموجة الموالية مستقبلا.
*أتاي نقص منو ويلا قدرتي تحيدو كاع، فهو بمثابة مضاد لامتصاص بعض المواد الغذائي.
*حنا شعب خبزي التركيبة، فانا عارف بيلا خبزة تال جوج فالنهار مايحدهاش ليك الطبيب، غير الى ممكن تنقص منو و تعوضو بالخبز الكامل ألياف ومواد غذائية أكثر اللي كاتشبع.
* حاول تاكل بشويا و على خاطرك باش تشبع وبعد التلفزة ونتا في خضم “التهنشير”، (المعدل المتوسط هو 15 دقيقة عاد الجسم كايفرز هرمونات الشبع).
فقضية التقدية، ماعمرك تمشي للسوق ولا السوبرمارشي ونتا فيك الجوع، غادي تبقا تشري غير فالتخربيق وتزيد عليك فتضياع الفلوس ،خاصة فرمضان من أحسن تقضى بالليل من بعد الإفطار.
*فيامات العاديين من غير رمضان، الفطور قسي معا راسك مزيااان، فهي أهم وجبة فالنهار، هي اللي غاتحدد مستوى الجوع• على مدار اليوم، تعشى خفيف تفيق جاعر على الماكلة، وحاول تفادى تخرج مافاطرش .
باش منكترش نعطيك شي حاجة بالنسبة للرياضة :
تحرك شويا ولعب ماتشات، يا ايما باسكيت، ولا كورة ولا الكريكيت نتا كاع، المهم لقا شي سبب باش تعرق ، حنا فرمضان اللعب فالليل كايكون من احلى الأوقات، استغلو….
* قبل ماتنعس ضرب ليك شي 40 ولا 400 طراكسيون اللي قديتي عليه المهم هو تبقى ديما تشوكي الجسم ديالك.
* الى بغيتي تجري فطبق مبدأ اللي هضرنا عليه قبيلات، ضرب واحد الجرية بحال ملي يكون تابعك شي كلب مثلا ، لمدة دقيقة، ودير جرية خفيفة ترجع بيها السوفل لمدة 3 الدقايق، عاود هاد العملية مرارا.
* فقضية الحديد، فعلا رفع الأثقال ثبت الفعالية ديالو فتطياح الوزن، اذ كايصدم الجسم وكايرفع من انتاج هرومون التستسترون بالنسبة للرجال، وكايرفع معدل الحرق، فايلا ماكانتش الميزانية اولا الظروف مواتية باش دخل لاصال فكاينين برامج منزلية باستعمال غير الوزن ديال الجسم ديالك.
* حيد الكارو و..، ويلا مبلي نقص من داك الزمر.غاتخلصها فصحتك من بعد، ونتا حر بطبيعة الحال.
مابغيتش نكثر هادشي واخا مازال فيه ما يتقال، غير أهو المهم فهادشي كامل هو الرغبة هي الاساس باش تبدل النمط الغذائي و الصحي ديالك.
حساب الكاتب على الفيسبوك : www.facebook.com/adoola
الله يرحم ليك الوالدين نصاءىح جد مهمة وساهلة ،،،مش بحال اللي كنسمعو ف الراديو كل يوم بلا فايدة ،، رمضانك مبارك سعيد وكل عام وانتم. بالف خير ،،،
Chukran Si Adil Sujet F Mostawa O nasa2i7 Mofida
تهم كاتب المقال:
السطر 13 ابتداء من الا سفل: ماذا تعني ب 40 ولا 400 طراكسيون.
ملا حظة: امبرزطني حاجة واحدة : الدارجة بدون شكل الحروف تبقى خاضعة لكل التاويلا ت
عاجني في المقال بزاف اديال لحوايج من بنهم الابداع والشجاعة في استعمال العامية.
تحياتي الى زايو : زايو المدينة التي لا تحب السمنة, زايو المدينة التي لا تحب ماكدونالد بل تمور الصحراوي .
اخيرا تحيا les fruis de saisons